السلام عليكم و رحمة الله تعالى و بركاته
في كثير من المرات الواحد فينا يعيش حياة من الملل و المشاكل الكثيرة و كيما نسميوها حنا في العامية نتاعنا الدقوطاج .... و على هذا الواحد فينا تلقاه غير يستنى في الأيام تمشي و كل ما يفوت نهار يفرح و يزيد يعيش النهار الجديد بنفس عقلية النهار الماضي و هكذا الروتين كل يوم يتعاود .... و نظرا للروتين اليومي المعاش تلقى الواحد يفرح للأيام كي راهي تفوت رغم أن كل يوم يمر يعني راهو نهار نقص من حياتنا و رانا زايدين نهار بعد نهار نقربوا من الأجل نتاعنا و لكن كلنا للأسف عمرو ما نظر للحياة بهذا المنظور على هذا عاد ما عندناش حساب للوقت... يعني نتمنى الوقت يمشي بسرعة من أجل تطلعنا لمستقبل أفضل رغم أننا لا نعلم واش راهو يخبي لينا الغد ممكن حتى حياتنا رايحة تتوقف قبل الغد ....
يعني قصة الوقت هاذي راهي ولات ما عندها حتى معنى عندنا المهم أن الأيام تمشي و الواحد عايش و يستنى الغدوة كاشي جديد رايح يصرى و تلقى كامل الناس كارهة و مديقوتية ... رغم أن الوقت عاد يمشي بسرعة رهيبة أمام التطور الهائل إللي راهو يشهدو العالم اليوم .... و على هذا لازم علينا دايما نعيش كل لحظة و كأنها هي اللحظة الأخيرة لأن العمر راهو قصير و ممكن في لحظة تلقى روحك ما كانش ... و الحياة راهي رايحة تمشي و عمرها ما تتوقف سواء عشت لحظات سعيدة ولا حزينة و بالعكس إذا كنت دايما حزين رايحة تمر عليك مرار و تولي تخمم في أنك تعمل أشياء جنونية رايح تندم عليها طول حياتك إذا بقيت عايش و رايح تتحاسب عليها غدوة قدام ربي سبحانه و يكون يومها حسابك عسير ...... و على هذا لازم الواحد فينا يعيش حياتو لحظة لحظة و يحاول قدر الامكان يعطي معنى للوقت لأن الوقت كالسيف إن لم تقطعه قطعك..... و لازم ديما ندير في بالنا الوقت راهو رايح يمشي حبينا ولا كرهنا و من الأفضل لينا نعيش حياتنا لحظات سعيدة ..... لأنك أنت هو من يقرر طبيعة حياتك يعني إذا حبيت تشوف العالم هذا بمنظور إيجابي رايح يكون إيجابي و إذا حبيت تشوفو بمنظور سلبي رايح تلقاه سلبي ....... و كما يقال كن جميلا ترى الوجود جميلا.
و في هذا السياق كنت كتبت واحد العبارة و حبيت نوصلها ليكم
الحياة لحظات ... منها الصعبة ... و منها السعيدة ... و لكن ما أحلى مرارة صعوبتها ... و ما أسرع مرور حلاوة سعادتها
و في الأخير تقبلوا مني فائق الاحترام و التقدير
موضوع: معنى الوقت .... و علاقته بحياتنا 
2010-07-28, 12:45
